.JPG)
Vau vos presentar quauqueis endrechs per parlar occitan. D’en primièr en cò mieu puèi a Montpelhièr.
A Aigas-Mòrtas, lo cèrcle Lenga d’Òc organiza totei lei dimècres un talhièr de lenga dau terrador a l’escòla « Charles Gros » de cinc oras e mièja a sèt oras e mièja dau vèspre.
A Sant Laurent d’Aigoza, lo cèrcle Lenga d’Òc organiza totei lei primièrs dimars dau mes un café provençau a l’Ostau dau Pòble a sèt oras dau vèspre.
Per mai d’informacions, podètz telefonar au 04.66.73.51.23 o au 06.24.71.33.41.
A Montpelhièr, per parlar la nòstra lenga, podètz anar rescontrar la joinessa dau Med’òc !!
Lo Med’òc organiza un talhièr de lenga e d’escambi linguïstic totei lei dimars de sièis oras e mièja a nòu oras dau vèspre au caselon a l’Ostau deis Estudiants de la fac Pau Valèri. Aquò comença lo dimars primièr de Febrièr. Lei talhièrs son un moment de convivència e de partatge e l’encòp pedagogic e joiós per tot lo monde, quin que siague son nivèu de lenga (aprenaire o coneisseire, avèm totei d’aprene deis autrei !!)
Cite : « Nautres portam de que beure, vautres portatz vòstres parlars ».
Per ne saupre mai sus leis activitats prepausadas, siatz convidats a venir a l’amassada generala dau Med’òc que se debanarà lo dimècres nòu de febrièr a sièis oras e mièja au caselon.
Per lei mai curiós encara, podètz picar sus vòstreis ordenadors, i a de grops fòrça interessants sus Facebook :
Montpelhièr en Òc es un grop creat per Alexandre Marion. Aqueu grop organiza de seradas charradissas en occitan coma la Serada « Parla la lenga ».
Lei tòcas d’aqueu grop e d’aquelei seradas son (cite) :
- Balhar d’escasenças de practicar le lenga
- Faire sortir l’occitan dins la vila en defòra dau mitan occitanista
- Socializar la lenga
- Melhorar son nivèu de lenga
- Faire descobrir la lenga
- Faire de rescòntres
- …
Per ieu, es tot simplament lo biais de rescontrar de monde novèu, de personas que sabon l’occitan mai qu’an pas l’escasença de lo parlar dins una associacion, dins l’encastre de cors, a la fac, o autre.
Per exemple, parlère ambe una hilha gascona fòrça simpatica que se sona Pirena e qu’aguèt l’occitan coma lenga naturala, mairala, puèi qu’a l’ostau èra la lenga « normala ». Es rare a l’ora d’ara e me regalère de parlar ambe ela que quequejava de lònga dins son gascon perfièch !!
Vaquí, e a benlèu au Med’òc !!
