Lo blòg de la Sanquilha: Mai de qu’es aquò una ferrada ???

Una ferrada es una granda fèsta per una manada. La tòca de la ferrada es d’aplicar sus la cuèissa esquèrra de l’anoble (qu’es un vedèu d’un an) la marca de la manada e de li faire l’escossura.

La marca es la forma que lo menaire causís per representar sa manada, mai es tanben l’esplech de fèrre ambe lo quau se fai la marca a caud.

L’escossura es un talh, una copadura deis aurelhas dau buòu segon un esquèma pròpri a chasca menaire. Aquò permetrà de retrobar lei bèstias d’un tropèu que se mesclarián a un autre. Aquestei copaduras se fan ambe l’ajuda d’un cotèu d’un biais diferent per chasca manada.

Per exemple, « l’aurelha liure » que consistís en laissar una o lei doas

aurelhas intactas.

Autreis exemples « aramon », « òsca», ...

("en laissar" : participi present en "en + Vèrbe a l'infinitiu")

Per tornar a la ferrada, l’operacion se fai en mai d’un temps :

Primièr, lei gardians que van faire la ferrada se presentan ai convidats e lo pelòt soveta la benvenguda.

Puèi, lei gardians van quèrre l’anoble dins lo tropèu qu’es mai luènh dins lo prat. Es la tria.

Un còp que l’anoble es sortit dau tropèu, es la corsejada per menar la bèstia a l’endavant dau monde. Lo gardian ambe son fèrre (o fèrri, o trident o encara lo manche e d’un biais literari se ditz lo ficheiron) deu faire tombar lo vedèu per poder l’agantar. De còps que i a, d’atrapaires (o agantaires) vènon ajudar lei gardians.

Un còp l’anoble agantat, es lo moment de faire la marca e l’escossura.

Fin, lei gardians laissan l’anoble se’n anar e retrobar lo tropèu.

Lo bocin de l’aurelha es sovent balhada ais joines. Fau faire secar lo bocin dins la sau e ven rigida. Se ditz qu’es amulet.