Aprenem l'occitan

Ara, n’i a pron ambe lei buòus, alara vau vos presentar la campanha Aprenem l’occitan qu’es una campanha per la lenga occitana, una campanha de promocion dei cors d’occitan.

La campanha foguèt creada per tres assossiacions :

•      Institut d’Estudis Occitans  IEO 
•     Centre de Formacion Professionala Occitan  CFPO
•   Escòla Occitana d’Estiu  EOE – IEO 47 

                                           Mai d’un biais es prepausat per aprene l’occitan.

Per lei que trabalhan, i a lei cors dau ser.

Per lei que son de lònga sus l’ordenador, i a lei cors per internet.

Per lei que pòdon pas veire l’ordenador e que sabon pas de qu’es, i a la version anciana qu’es lei cors per corrier.

Per lei qu’an besonh de veire de monde e de s’amusar, prepausan d’estagis mai o mens lòngs pendent una dimenjada o en immersion e tanben d’estagis d’estiu.

En mai de la lenga es tanben l’escasença d’aprene la cultura occitana ambe de cants, de provèrbis, la literatura e l’istòria.

Coma ditz la campanha, es pas sonque per leis escolans, lei collegians, lei liceans o leis estudiants d’aprene una lenga. E mai se i a de vièlhs que tòrnan estudiants, n’i a que vòlon aprene  l’occitan sens èstre obligats d’aprene de linguistica o d’occitan medievau. Es per aquò que tròbe interessant de poder aprene la lenga occitana per aqueste biais.

En mai d’aquò lei cors son per totei lei nivèus de lenga, de debutant fins a locutor avançat.

Çò qu’es interessant tanben es que lei cors son de'n pertot en Occitània : 

• En Aquitània
• En Lengadòc-Rosselhon
• En Miègjorn Pirenèus
• En Nòrd Occitània
• En Provença Aups Còsta d’Azur
• A París (rai París es pas Occitània mai i a de cors donc... J ), Barcelona, dins lei Valadas d’Itàlia

La campanha Aprenem l’occitan creèt tanben lo labèl PARLESC.

Lo labèl PARLESC es una garantida minimala per l’aprenent; per saupre s’es un bòn cors o pas. Perque per aver lo labèl, fau emplenar de critèris. Es ben tanben per l’estructura perque li balha l’assegurança de la qualitat de son trabalh. Chasca cors pòt faire la demanda per obténer aqueste labèl. Per aquò i a lo quasèrn dei cargas qu’explica lo contengut dau labèl.

Per ne saupre mai sus lo quasèrn dei cargas, es aquí!

Per lei qu’an la canha de legir tot aquò vos ai fach un pichòt resumit :

A la gròssa per aver lo labèl fau

• Que i aja lo respèct de la legislacion per un cors.
• Que l’endrech onte se fai lo cors siague securisat e confòrm ambe d’estructuras per leis andicapats.
• Que leis aprenents siagan seguits e ben aculhits.
• Que l’estatut de chasque ensenhaire siague notat e respectat (que siague benevòu o salariat pagat).
• Que leis ensenhaires ajan de competéncias tant en occitan coma en pedagogia.
• Que lo cors siague de bona qualitat ambe la compreneson de chasque dialècte, l’escritura ambe la grafia classica normalisada, …
• Que lo professor faga son ròtle de pròf, es a dire pas tubar, pas beure de vin, èstre present a chasque còp, …
• E enfin que lo professor aja un bon comportament, que siague drech e corrècte, …

Donc, se lo cors pensa aver toteis aquelei critèris, pòt emplenar un dorsier de candidatura per obténer lo labèl.

De mai, l’estructura PARLESC organiza de formacions per permetre ais ensenhaires de completar sa coneissença, rescontrar e escambiar ambe d’autrei professors, ...

Vaquí, pense qu’ai pron fach la promocion d’Aprenem l’occitan donc vau m’arrestar!!!

(E òc parlar dei buòus, aquò me manca!! E perqué me manca? Per que a Sant Laurent, dei buòus, siam passionats!)