mardi 15 février 2011

De que son lei jòcs de gardians ???

Lei jòcs de gardians son de jòcs d’adreiça, d’abiletat per lei cavalièrs.

Lo jòc dau ramelet, o de l’esparvièr, o encara dau ratièr :
Es un jòc creat per lo Marqués de Baroncelli. Lo jòc compren un nombre impar de cavalièrs e i a dos refugis, un de chasca costat de la pista.
Lo jòc consistís en gardar un boquet de flors (lo mai sovent es un boquet de saladela) tengut dins una man pendent un temps balhat en resistir ais assauts deis autrei cavaliers, deis adversaris, per l’ofrir a la chatona que volèm embelinar.
Si lo cavalier resistís e capita de gardar lo boquet, la chatona li farà un poton per lo felicitar e lo cavalier li ofrirà lo boquet. Tot aquò, es donc un jòc per furar!!!


Lo jòc deis agulhetas :
Es un jòc que lei reglas ne tròban seis originas a l’Atge Mejan.
Chasca cavalier deu s’apoderar d’un anèu de cinc centimètres de diamètre ambe l’ajuda d’una agulheta, es a dire una espècia de lança. Lo cavalier ten la lança sota son aissèla, lo chivau bandit au galaup (ai quatre fèrres, ventre a tèrra, bon ne’n fau un pauc tròp, rai !) e ensaja de passar son agulheta dins un anèu qu’es fixat au bot d’una potència ambe una cordeleta.

Lo jòc deis iranges :
Aqueste jòc seriá estat introduch per lei Maures.
Dins aqueste jòc, lo cavalier es encara au galaup ambe son chivau e deu agantar una irantge qu’es pausada dins la man d’una joventa. La chata deu aver lo braç tibat a l’orizontala.
Aquò se fa sovent dins d’arenas ambe quatre a sièis joventas segon la grandor de la pista.
La fantasiá dau gardian qu’a capitat d’agantar leis iranges, es de getar lo mai luènh possible l'irange dins lei gents.



Lo saut de chivau a chivau :
Aqueste jòc foguèt inspirat dau Wild West Show de Buffalo Bill que lo Marquis coneissiá e aviá vist.
Ara, es un classic dins lei jòcs. Un pauc mens conegut, lo saut de chivau a buòu.



Lo jòc dei cadièiras :
Es lo jòc dei cadièiras musicalas mai ambe un chivau au galaup.
Lei cavaliers viran a l’entorn dei cadièiras puèi quand la musica s’arrèsta, lo cavalièr deu s’arrestar, davalar de son chivau e s’assetar sus una cadièira sens daissar son chivau.

La Parada dei cherpas :
Aqueste jòc seriá estat fòrça a l’onor a la cort dei papas en Avinhon. Lei quatre cavaliers qu’an tornat crear aqueste jòc foguèron Baroncelli d’Avinhon, Arnaud de Sant Just, Marc de Vauvèrt e Bonnet de Gallargas.
Es un pauc lo mèma principi que lo dau jòc dau boquet. Fau que chasca cavalier ensaje de levar lo riban (o la cherpa) estacat au braç d’un rivau tot en conservant lo sieu.






« volem » : emplec de la primièira persona dau plurau per lo « on » francés.
« que … ne » : per lo « dont » fancés.
« tornat crear » : emplec dau vèrbe tornar per lo prefixe “re” francés


Aucun commentaire:

Enregistrer un commentaire